Kryeministri i Maqedonisë, Zoran Zaev, i është përgjigjur Beogradit zyrtar lidhur me tërheqjen e trupit diplomatik serb,dy ditë më parë.
Me anë të një postimi në Facebook, Zaev thekson se Maqedonia është e vendosur në ndërtimin e raporteve të fqinjësisë së mirë me Serbinë, por edhe me vendet e tjera të rajonit.
“Ekzekutivi maqedonas mbetet i përkushtuar me forcë ndaj zgjidhjes, e jo krijimit të problemeve. Jemi të bindur se kjo është mënyra e vetme, që rajoni të ecë me vendosmëri përpara.”
Qeveria e Maqedonisë në një reagim të sajin mëngjesin e kësaj të marte, u shpreh se synon të mbajë marrëdhënie miqësore me të gjitha vendet fqinje të saj, por paralajmëron se vota për Kosovën në Unesko, i cili sipas Beogradit është arsyeja e tërheqjes së trupit diplomatik, do të diktohet nga qëndrimi i shumicës së vendeve anëtare të BE-së.
Ndërkohe, Ministri i Punëve të Jashtme të Serbisë, Ivica Daçiç, ritheksoi se vendimi për tërheqjen e gjithë personelit diplomatik, është një mesazh për Shkupin, se Beogradi është në dijeni të të gjitha marrëveshjeve të Maqedonisë.
