Maqedonia fillon bisedimet para-aderuese për anëtarësimin në NATO, ku pritet që delegacioni i Aleancës Veri-atlantike të njoftohet nga afër me gatishmërinë e Qeverisë për anëtarësim.
Në Shkup arriti një delegacion i NATO-s, i udhëhequr nga drejtori për çështje evropiane dhe globale, James McKee, i cili me institucionet e Maqedonisë do të bisedojë për çështje politike, të sigurisë, të mbrojtjes dhe financiare, në kuadër të negociatave për anëtarësim.
Në konferencën e përbashkët për media me koordinatorin kombëtar të Maqedonisë për anëtarësimin në NATO, Stevo Pendarovski, McKee shfaqi shpresën se Maqedonia, përafërsisht për një vit e gjysmë, do të bëhet anëtarja e 30-të e NATO-s.
Dyert e Maqedonisë në NATO ia ka hapur arritja e marrëveshjes me Greqinë për çështjen e emrit.
Megjithatë, anëtarësimi i Maqedonisë në këtë mekanizëm kushtëzohet me zbatimin e plotë të Marrëveshjes me Greqinë, me të cilën emri i saj ndryshon në Maqedonia e Veriut.
