Ligji për zyrtarizimin e gjuhës shqipe në Maqedoni ka hyre në procedurë parlamentare, ndërsa është shoqëruar me debate të ashpra mes mazhorances dhe opozitës së kryesuar nga VMRO.
Deputeti I VMRO-së, Antonio Milloshovski u shpreh se projektligji është antikushtetues dhe dëmton komunitetet e tjera më të vogla etnike.
Por, drejtuesi i Komisionit për Çështje Europiane, deputeti Artan Grubi, sqaroi se ligji për gjuhën shqipe nuk e cenon as Kushtetutën dhe as karakterin unitar të vendit.
Deputeti i BDI-së, Xhevat Ademi theksoi se ligji është në frymën e Marrëveshjes së Ohrit dhe në funksion të ndërtimit të mirëbesimit mes komuniteteve.
Por, ekspertët janë pesimistë përsa i përket zyrtarizimit të gjuhës shqipe. Sipas Osman Kadriut, projektligji sjell vetëm avancimin e gjuhës shqipe, por jo zyrtarizimin e saj.
Debati për projektligjin për zyrtarizimin e gjuhës shqipe në vendin fqinj do të vazhdojë deri të enjten, për të vijuar më pas në seancë plenare.
Drafti parashikon përdorimin e gjuhës shqipe edhe në institucionet shtetërore, gjë e cila do të sjellë lehtësi edhe në procedurat ligjore për të gjithë shqiptarët që jetojnë në Maqedoni.
