Dy skuadrat angleze, Manchester City dhe Liverpool, të cilat udhëheqin Premier League, kanë fituar edhe takimet e parë të fazës çerekfinale të Champions League, të luajtur të martën në mbrëmje.
Punën më të vështirë e pati skuadra e Pep Guardiolës, që fitoi aktin e parë 1 me 0 në shtëpi kundër Atletico Madrid. Autobusi që parkoi Simeone para portës se Jan Oblak nuk shërbeu për të shmangur humbjen, por vlejti për të mos pësuar një humbje të rëndë.
Një sfidë jo spektakolare për hir të së vërtetës, pasi Manchester City u përpoq gjithë kohën të gjente hapësira, ndërsa madrilenët u mbrojtën fort, duke i besuar kundërsulmit, por pa qenë kërcënues në radhët e mbrojtjes angleze.
Aq fort u mbrojt ekipi spanjoll saqë gjuajtja e parë në portë e vendasve ishte me një goditje dënimi të De Brojnë në minutën e 55. Zëvendësimet e Guardiolës, Foden, Grilis dhe Gabriel Zhesus dhanë efekte pozitive, ndonëse ai që shënoi ishte ylli belg De Brojnë.
Deri në fund pak gjëra për t’u evidentuar, me përjashtim të një fakti që kur flasim për nivele të tilla si Champions League bën përshtypje. Fakti që Atletico Madrid e mbylli ndeshjen pa gjuajtur asnjëherë në portë.
