Manchester City shpallet matematikisht kampion i Premier League. Titulli i shtatë në histori për “Qytetaret” u sigurua në “Old Traford”, pasi rivalët e tyre më të afërt në renditje, Manchester United humbën në shtëpi me rezultatin 2-1 nga Leicester.
Po t’i kthehemi fillimit të sezonit, nuk ka qenë nisja më e mirë e Cityt, pasi në ndeshjen hapëse ata u mposhtën 5-2 nga Leister. Ngërçi në rezultate pozitive vazhdoi për ekipin e Guardiolës, të cilët në muajin nëntor e shihnin veten 8 pikë larg kreut dhe dukej sikur as ky vit nuk do të ishte i tyre. Por me nënshkrimin e Ruben Dias, Guardiola gjeti qetësinë dhe ekuilibrin në repartin defensiv.
Më pas “Qytetarët” bënë një kthesë të jashtëzakonshme të cilët arritën të fitojnë 22 nga 27 ndeshjet e tyre të ardhshme, duke përfshirë 15 ndeshje radhazi dhe rekordin e 11 fitoreve të njëpasnjëshme në transfertë. Një sezon fantastik për Guardiolën i cili siguroi trofeun e tetë në krye të Cityt, tre prej tyre Premier League. Ndërkohë spanjolli e konsideroi si titullin më të vështirë të fituar ndonjëherë dhe shprehet krenar për lojtarët e tij.
PEP GUARDIOLA
TRAJNER I MANCHESTER CITY
“Ky ishte më i vështiri. Ne gjithmonë do ta kujtojmë këtë sezon për mënyrën se si fituam. Jam shumë krenar që jam menaxher i ketij klubi dhe i këtij grupi lojtarësh. Ata janë shumë të veçantë. Duke marrë parasysh çfarë kemi kaluar këtë sezon, me të gjitha kufizimet dhe vështirësitë që kemi hasur – dhe për të treguar këtë qëndrueshmëri që kemi, është e jashtëzakonshme. Unë kam qenë në Spanjë, kam qenë në Gjermani, dhe mund të them se deri me tani, kjo është liga më e fortë.”
Tashmë vëmendja në Premier League është fokusuar e gjitha në pozitat që të çojnë në Ligën e Kampionëve. Leister ka hedhur një hap të rëndësishëm pas fitores 2-1 në “Old Trafford” ndaj United dhe tashmë ndodhen në vend të tretë pas Djajve të Kuq, me 66 pikë, ndjekur nga Chelsea me 64 dhe West Ham me 58 pikë të cilat kanë dhe një ndeshje më pak.
