Në qytetin e Maliqit është hapur një ekspozitë e veçantë dedikuar peizazhit, ku disa prej piktorëve më të njohur kanë paraqitur punimet e tyre. Ekspozita ka tërhequr vëmendjen e dashamirësve të artit, të cilët kanë admiruar interpretimet unike të natyrës dhe mjedisit përreth.
“Peizazhi është një burim i pashtershëm frymëzimi. Synimi im ka qenë të sjell përjetime autentike nga natyra jonë”, tha piktori Kudret Dulellari.
Artan Kaja, i cili eksperimenton shpesh me dritën dhe hijet, thekson rëndësinë e lidhjes emocionale me natyrën.
“Çdo peizazh që pikturoj është një histori më vete. Më pëlqen të kap momente që shpesh njerëzit i kalojnë pa vënë re”, tha piktori Kaja.
Ndërsa Aleksandër Lledhi, i cili ka fituar vlerësime për përdorimin e ngjyrave të forta, shprehet: Natyra është plot kontraste, dhe përmes pikturave të mia përpiqem t’i jap jetë këtyre kontrasteve. Maliqi ka qenë gjithmonë një frymëzim i madh për mua.
Ekspozita do të qëndrojë e hapur për tri ditë, duke ofruar një mundësi për të gjithë ata që duan të shijojnë artin e peizazhit dhe të reflektojnë mbi bukuritë e natyrës./vizionplus.tv
