Dy aksidente me tre të plagosur në Bulqizë, një niset drejt Traumës në Tiranë
Dy aksidente janë regjistruar në Bulqizë këtë të mërkurë.
Dy automjetet e para u përplasën në afërsi të urës që lidh dy lagjet e qytetit në vendin e quajtur “Vajkal”.
Aksidenti i dytë u shënua vetëm pak minuta më pas në vendin e quajtur “Pishat” ku dy automjete që lëviznin në drejtime të kundërta u përplasën me njëri – tjetrin.
Si pasojë e këtyre aksidenteve, tre persona mbetën të plagosur ku u dërguan në spitalin e Bulqizës për të marrë ndihmën e parë.
Për shkak të gjendjes më të rëndë një grua u transportua për mjekim më të specializuar në spitalin e Traumës në Tiranë dhe ndodhet jashtë rrezikut për jetën.
Dy të plagosurit e tjerë po marrin ndihmën e nevojshme në spitalin Bashkiak Bulqizë.
Në të dy vendngjarjet kanë mbërritur grupet hetimore të cilat pritet të zbardhin dinamikën dhe shkaqet e aksidenteve.
