Pas mbledhjes urgjente me kabinetin qeveritar ditën e sotme, kryeministri Mariano Rajoy ka mbajtur një fjalim në parlamentin e Spanjës ku ka sqaruar se aktivizimi i nenit 155 të Kushtetutës spanjolle, që i lejon qeverisë të marrë kontrollin mbi rajonet, do të ishte hapi i radhës nëse autoritetet katalanase nuk tërhiqen nga veprimet e tyre të paligjshme.
Neni 155 nuk është vënë kurrë më parë në përdorim në Spanjë. Kjo dispozitë kushtetuese thotë se qeveria, i drejtohet fillimisht me një kërkesë presidentit të komunitetit, dhe nëse kjo kërkesë nuk merret parasysh, me aprovimin absolut të Senatit mund të ndërmarrë masat e nevojshme për ta detyruar këtë të fundit që të përmbushë këto detyrime duke mbrojtur interesin e përgjithshëm.
Në seancën e djeshme të parlamentit rajonal, Presidenti i Katalonjës, Carles Puigdemont, u shpreh se “ka marrë mandatin e popullit” që Katalonja të kthehet në një shtet të pavarur dhe më pas propozoi që të pezullojë për një afat kohor të caktuar efektet e shpalljes së pavarësisë për të ndjekur rrugën e dialogut.
Nga ana tjetër, kryeministri spanjoll, Mariano Rajoy ripërsëriti kërkesën e tij ndaj udhëheqësit të Katalonjës për të qartësuar nëse e ka deklaruar rajonin të pavarur apo jo, por këtë e bëri duke shpalosur edhe kërcënimin se qeveria qendrore mund të kufizojë autonominë katalanase, nëse është shpallur pavarësia.
Në fjalimin e tij përpara Parlamentit spanjoll, Rajoy tha se përgjigjja e presidentit Puigdemont do të ishte vendimtare dhe jetike për të vendosur “ato që do të vijnë përgjatë ditëve në vijim”.
Megjithatë, në fjalimin e Rajoyt përpara Parlamentit u theksua qartë se ai ka qenë gjithnjë i gatshëm për dialog, por autoritetet katalanase kërkonin “ose referendum, ose referendum”. “Ndaj, të mos përpiqen të gjejnë fajtorë të tjerë, por të kuptojnë se kush janë fajtorët e vërtetë në gjithë këtë situatë krize, më e rënda gjatë demokracisë sonë”, deklaroi Rajoy.
