Rivalët në garën presidenciale franceze u përballën në debatin e dytë televiziv. Liderja e ekstremit të djathtë, Fronti Nacional, Marine Le Pen, u shënjestra nga kandidatët e tjerë gjatë përballjes që zgjati tre orë.
Debati u përqendrua në çështjet e Europës, emigracionit dhe ekonomisë, ndërsa nuk munguan sulmet personale. Le Pen u përball me kandidatin e qendrës Emmanuel Macron.
Emmanuel Macron: Nacionalizmi është luftë. Më falni që po jua them, zonja Le Pen, por po thoni të njëjtat gënjeshtra qe ka thënë babai juaj për 40 vjet.
Marine Le Pen: Ju zoti Macron s’mund të pretendoni se jeni i ri, kur flisni si fosile të paktën 50-vjeçare.
Le Pen premtoi të rikthejë kontrollin e kufijve të Francës dhe të heqë nga përdorimi monedhën euro, duke rikthyer frangën dhe të mbajë një referendum për daljen e Francës në BE. Duke u ndalur tek siguria, ajo tha se Franca eshtë kthyer në universitet për xhihadistët, që shkaktoi reagime edhe ndërprerje nga kandidatët e majtë.
Sipas sondazheve, Le pen dhe Macron janë më të favorizuarit, por nëse asnjë kandidat nuk fiton mbi 50 përqind në 23 prill, raundi i dytë do të mbahet në 7 maj.
