Presidenti francez Emmanuel Macron emëroi këtë të martë ministrin e Mbrojtjes, Sébastien Lecornu, si kryeministër të ri të Francës, i katërti brenda afro një viti, në një periudhë të trazuar politike për vendin.
Lecornu, 39 vjeç, ishte ministri më i ri i Mbrojtjes në historinë e Francës dhe arkitekti i një rritjeje të ndjeshme të buxhetit ushtarak deri në vitin 2030, e nxitur nga pushtimi rus i Ukrainës.
Ish-konservator që iu bashkua lëvizjes centriste të Macron-it në vitin 2017, ai ka mbajtur poste në administratën lokale, territoret jashtë Francës, si dhe gjatë krizës së “jelekëve të verdhë”, ku luajti rol kyç në organizimin e debatit kombëtar për të qetësuar zemërimin e qytetarëve përmes dialogut. Në vitin 2021, ai gjithashtu ofroi bisedime mbi autonominë gjatë trazirave në Guadelupë.
Emërimi i Lecornu-t pasqyron instinktin e Macron-it për të shpërblyer besnikërinë politike, por edhe nevojën për vazhdimësi dhe stabilitet, pasi përplasjet e njëpasnjëshme rreth buxhetit kanë rrëzuar disa qeveri dhe kanë lënë Francën në një situatë pa drejtim të qartë.
Të hënën, parlamenti rrëzoi me votë mosbesimi qeverinë e ish-kryeministrit François Bayrou, duke thelluar edhe më tej krizën politike në ekonominë e dytë më të madhe të eurozonës.
