Lufta për rajonin lindor rusishtfolës të Donbas sapo ka nisur.
Breshëri sulmesh, bombardimet dhe raketat nuk kanë kursyer as civilët dhe zonat e banuara, ndërsa trupat ukrainase vijojnë të rezistojnë.
Presidenti Volodimir Zelenski deklaroi se qytetet lindore po përballen me një ofensivë të ashpër, por nuk do të dorëzohen.
VOLODYMYR ZELENSKIY
PRESIDENT I UKRAINES
“Është vetëm çështje kohe se kur do të çlirohet i gjithë territori i shtetit tonë. Tashmë mund të thuhet se trupat ruse kanë filluar betejën për Donbasin, për të cilën janë përgatitur prej kohësh. Një pjesë shumë e madhe e të gjithë ushtrisë ruse tani është e fokusuar në këtë ofensivë. Pavarësisht se sa ushtarë rusë janë vendosur atje, ne do të luftojmë. Ne do të mbrohemi. Nuk do të heqim dorë nga asgjë ukrainase dhe nuk kemi nevojë për atë që nuk është e jona.”
Moska pretendon se ka nën kontroll 93% të Luhanskut dhe 54% të Donetskut dhe forcat e saj pritet të rrethojnë trupat e mbetura ukrainase në rajon. Por ndërkohë, rreth 50,000 ushtarë ukrainas gjenden në Donbas, shumë prej të cilëve kanë kaluar vite duke luftuar kundër forcave separatiste të mbështetura nga Rusia në rajon.
Rusia vazhdon të synojë edhe qytetin juglindor të Mariupolit, i cili do t’i lejonte trupat e saj të përfundonin një urë tokësore midis gadishullit të pushtuar të Krimesë dhe forcave në rajonet e kontrolluara nga separatistët në Ukrainën lindore.
Zyrtarët në Kiev pohuan se avionët luftarakë rusë po përgatiteshin të hidhnin bomba 5-tonëshe në uzinën e Azovstal, ku strehohen rezervat e fundit ukrainase.
Rreth 100,000 njerëz kanë mbetur në qytetin port, pa ushqim, ujë, ngrohje apo energji elektrike ndërsa korridoret humanitare janë mbyllur sërish. Mariupol para lufës, numëronte rreth 450,000 banorë.
