Presidenti rus Vladimir Putin është i gatshëm të zhvillojë dialog me presidentin francez Emmanuel Macron, nëse ekziston vullnet politik nga të dyja palët, deklaroi zëdhënësi i Kremlinit, Dmitri Peskov, për agjencinë ruse RIA.
Sipas Peskovit, Putin ka shprehur më herët se është i hapur për bisedime me Macron dhe çdo dialog i bazuar në vullnet të ndërsjellë politik do të ishte pozitiv. Këto deklarata vijnë pas komenteve të Macronit, i cili pas samitit të BE-së u shpreh se do të ishte e dobishme të rifillonte komunikimi me presidentin rus.
Presidenti francez theksoi se disa liderë tashmë po flasin me Putinin, duke iu referuar në mënyrë indirekte presidentit amerikan Donald Trump, dhe shtoi se Evropa dhe Ukraina duhet të krijojnë një kornizë të përbashkët dialogu për të shmangur negociata të zhvilluara pa përfshirjen e tyre.
Ndërkohë, Bashkimi Evropian miratoi një paketë kredish prej 90 miliardë eurosh për Ukrainën, për të mbuluar nevojat financiare të dy viteve të ardhshme. Përpjekjet diplomatike të SHBA-së kanë vazhduar me takime të ndara me Rusinë, Ukrainën dhe zyrtarë evropianë, por pa rezultate konkrete për përfundimin e luftës.
Këtë javë, përfaqësues të Ukrainës, vendeve evropiane dhe SHBA-së u takuan në Miami. Nga ana amerikane morën pjesë Steve Witkoff dhe Jared Kushner. I dërguari rus Kirill Dmitriev zhvilloi bisedime me ta, të cilat i cilësoi si konstruktive dhe që pritet të vazhdojnë.
Aktualisht nuk parashikohen bisedime direkte mes Moskës dhe Kievit. Presidenti ukrainas Volodymyr Zelensky u bëri thirrje Shteteve të Bashkuara të rrisin presionin ndaj Rusisë.
/vizionplus.tv
