Lëvizja Socialiste për Integrim(LSI) i bëri sot thirrje të gjitha institucioneve shtetërore, përgjegjëse që të reagojnë menjëherë dhe me veprime konkrete ndaj shqetësimit të përsëritur të partnerëve tanë dhe Departamentit Amerikan të Shtetit (DASH) për situatën e rëndë që ka të bëjë me kultivimin dhe trafikimin e lëndëve narkotike.
Nga selia e LSI-së, nënkryetari i saj, Luan Rama, ju referua raportit të fundit të DASH, që siç tha ai, konfirmon edhe njëherë faktin e rëndë që Shqipëria vazhdon të mbetet një burim i rëndësishëm për prodhimin e marijuanës dhe një rrugë kalimi për drogat e tjera, si kokaina dhe heroina, drejt tregut europian.
“Ky konstatim shqetësues kërkon menjëherë një reagim konkret e të përgjegjshëm të institucioneve ligjzbatuese dhe agjencive që kanë detyrë luftën kundër trafikut të drogës, si dhe një reagim të përgjegjshëm të institucioneve shtetërore”, tha Rama.
Ai vuri ne dukje se LSI, në vijimësi, ka qënë e vendosur dhe gjithnjë ka apeluar për rëndësinë që merr reagimi i përgjegjshëm dhe lufta e vendosur e pa asnjë ekuivok ndaj çdokujt që rezulton i implikuar me kultivimin apo trafikimin e lëndëve narkotike, tha nënkryetari i Lëvizjes Socialiste për Integrim.
Është e rëndësishme të dëshmojmë angazhim dhe përgjegjësi konkrete në këtë drejtim në mënyrë që Shqipëria të mos bëjë më spektakle me policë që i çojnë të asgjësojnë kanabis. Shteti e ka për detyrë të parandalojë dhe te luftojë këtë veprimtari kriminale të shkeljes së ligjit, por dhe krimin dhe korrupsionin, u shpreh Rama.
I pyetur për ndryshimet e fundit në qeveri, nënkryetari i LSI-së, u përgjigj se ato janë çështje ekskluzive e kryeministrit. “LSI dhe Ilir Meta as ka bërë dhe as do bëjë ndonjëherë ndonjë kërkesë për këtë. Kur kemi pasur nevojë, kemi bërë ndryshime me përfaqësuesit tanë në qeveri. Në këtë drejtim kemi qënë luajalë”, u shpreh Luan Rama.
