E mërkura ka shënuar qëndrime të dyfishta të zyrtarëve të Lëvizjes Socialiste për Integrim. Kreu i Grupit Parlamentar Petrit Vasili kundërshtoi kritikat që Luan Rama, Sekretari i Përgjithshëm i bëri qeverisë për politikat fiskale. Vasili e konsideroi si qëndrim personal atë të Luan Ramës edhe pse ky i fundi foli nga selia e partisë. Petrit Vasili nënvizoi se bashkëpunimi konstruktiv me FMN-në është me rëndësi për vazhdimin me sukses të reformave të nisura. Më herët, Luan Rama, në një konferencë për shtyp shprehu rezerva për vendimet e per dhënien me koncesion te disa veprave te mëdha.
“Teprimi me koncesionaret, është një tërheqje vëmendje. Partneriteti publik-privat është i rëndësishëm për vendin, por në këtë partneritet nuk është i rëndësishëm vetëm buxheti i shteti, por edhe privati duhet të jetë bashkëveprues dhe bashkëfinancues”.
Luan Rama tha se qeveria duhet të tregohet më e kujdesshme dhe të respektojë rekomandimet e FMN-së, të publikuara në raportin e saj më të fundi. Pa bërë paralajmërime për ditë të vështira të ekonomisë, Luan Rama duke u kthyer në kohë, kujton edhe periudha shumë të rënda që vendi ka kaluar, kur këto rekomandime nuk janë respektuar.
“Raporti kërkon seriozitet dhe maturim, përgjegjshmëri në reflektim, pasi sa herë kemi neglizhuar apo sa herë që qeveria nuk i ka marrë me seriozitet, jemi ndeshur me kriza në zhvillimin ekonomik, social dhe politik. Kujtoj këtu krizën e vitit 1997”.
Në ligjëratën disa minutëshe të kritikave ndaj politikave financiare të qeverisë dhe tërheqjes së vëmendjes, LSI kërkon që qeveria vëmendjen duhet t’ia kushtojë standardit të jetesës dhe mirëqenies së qytetarëve.
