Minsitri I Brendshëm Sandër Lleshaj ka reaguar pas arrestimit të shumëkërkuarit Tesi Basho në Selenicë të Vlorës.
Në një postim në Facebook, ministri Lleshaj deklaroi se finalizimi i këtij operacioni provoi qartazi nivelin e integritetit dhe profesionalizmit të Policisë së Shtetit.
Lleshaj thekson se vullneti politik për luftën kundër krimit është I paepur ndërsa bën me dije se operacioni ende vazhdon.
“Policia e Shtetit arrestoi sot në Selenicë një ndër kriminelët më të rrezikshëm në vend, një vrasës të shumëfishtë, të arratisur nga burgu në Itali dhe të dyshuar edhe për vepra të tjera të rënda. Finalizimi i suksesshëm i këtij operacioni provon qartazi nivelin e integritetit dhe profesionalizmit të Policisë së Shtetit, e cila po e rrit përditë forcën e saj goditëse ndaj krimit. Por kjo është vetëm NJË goditje e radhës në serinë e pandalshme që vijon. Vullneti politik për luftën kundër krimit, është i paepur. Policia e Shtetit është plotësisht e motivuar dhe mbështetja e bashkëpunimi i qytetarëve për të, në funksion të një Shqipërie me të drejtë dhe më të sigurtë, është në rritje të vazhdueshme.Vlora duhet të ndihet sot edhe më e qetë dhe më e sigurtë, ndërsa Policia e Shtetit më krenare për operacionin e planifikuar dhe finalizuar me mjeshtëri profesionale. Përgëzime dhe respekt për të gjithë ata pjesëtarë të PSH që kontribuuan në këtë sukses. Ndërkohë, operacioni vazhdon… “
