Lleshaj takon Sobotka: “Forca e Ligjit”, do të vijojë me forcë e ritëm
Ministri i Brendshëm Sandër Lleshaj është takuar këtë të martë me Presidentin e Këshillit Kombëtar të Austrisë, Wolfgang Sobotka, ku temë e bisedës ka qenë thellimi i bashkëpunimit mes dy vendeve, me fokus të veçantë përmbushjen e kushteve prej Shqipërisë në rrugëtimin drejt BE-së.
Ministri Lleshaj u shpreh se procesi i integrimit për Qeverinë shqiptare mbetet qëllim kombëtar. Duke u ndaluar tek reformat e realizuara, Sobotka theksoi se Vettingu në sistemin e drejtësisë është një pikë kyçe në këtë proces, dhe në këtë kontekst, vlerësoi dhe inkurajoi përpjekjet e Shqipërisë për të vijuar më tej.
Nga ana tjetër presidenti Sobotka tha se lufta kundër krimit të organizuar, jo më kot është një pikë e rëndësishme në kërkesat e BE-së, duke nënvizuar se rezultatet do të bindin edhe vendet ende skeptike. Ai deklaroi se Austria mbetet një partner shumë i rëndësishëm i Shqipërisë, e këtu veçoi jo vetëm marrëdhëniet bilaterale, por edhe në një kontekst më të gjerë rajonal.
Ministri i Brendshëm konfirmoi se Vetting-u në drejtësi, do të pasohet nga Vetting-u në Policinë e Shtetit, duke shtuar se nderi dhe integriteti i punonjësit të Policisë janë themelore për të patur një trupë policore profesionale dhe të shëndetshme.
Gjithashtu në fjalën e tij Ministri konfirmoi bashkëbiseduesit se Task Forca Speciale, në kuadër të Operacionit “Forca e Ligjit”, si një punë e nisur nga ministri paraardhës, do të vijojë më me forcë e ritëm, duke përfshirë gjithë strukturat dhe agjencitë ligj zbatuese.
