Ministri i Brendshëm, Sandër Lleshaj deklaroi se do të ketë të tjera arrestime në lidhje me grabitjen e Rinasit.
Nga Kukësi ku mori pjesë në nismën “Ministri një ditë në qark”, Lleshaj tha para gazetarëve se grupi që kreu grabitjen në Rinas ka aktivitet jo vetëm në Shqipëri por edhe në Kosovë.
“Kjo çështje është ende nën hetim. Megjithëse ka ecur shumë, unë nuk mund të ekspozoj detaje të shumta. Grupi tashmë i shkatërruar tashmë ka një arkiv të pasur të aktiviteteve negative kriminale jo vetëm në Shqipëri por edhe në Kosovë. Procedurat e hetimit vazhdojnë në funksion të zbardhjes dhe kapjes së autorëve. Do të ketë arrestime të tjera. Disa nga krerët e grupit janë arrestuar por ka edhe të tjerë.”
Më tej ministri komentoi edhe protestën e opozitës. Ai tha se bllokimi rrugëve ësthë degradim politik dhe nuk është zgjidhje.
“Është e drejta e të gjithëve për të protestuar. Por bllokimi i rrugëve është degradim politik në të gjitha aspektet. Nuk është bllokimi i rrugëve zgjidhje politike. Nuk mund ta mbysësh qeverinë duke bllokuar rrugët, qeverinë e mbyt duke fituar zgjedhjet. Duke bllokuar rrugët mbyten qytetarët. I bëj thirrje opozitës nga Hasi, të kthjellohen e ti thërrasin arsyes dhe të kthehen në rrugët normale të politikës.”
