Liverpool është tjetër nivel, minimalisht kur përballë ka një rival si Villareal.
Rezultati 2 me 0 I takimit të parë të gjysmëfinales, por veçanërisht diferencat në atë që ekipet prodhuan në fushës e lojës dëshmojnë se të kuqtë, përjashto ndonjë nga ato mrekulli që ndodhin rrallë në futboll, e ka prenotuar tashmë një biletë për në finalen e madhe të Parisit.
Nëndetësja e verdhë qëndroi lart mbi ujë për të luftuar përgjatë gjithë pjesës së parë, aty ku skuadra e Klop provoi me çdo mënyrë të shënonte, por nuk ia doli dot mbanë. Në ndonjë rast edhe e tradhtuar nga fati sikurse shtylla e minutës se 42 pas goditjes së bukur të Tiago Alkantares nga jashtë zone.
Mirëpo e gjithë kjo situatë nuk e shqetëso dhe nuk e vuri nën presion Liverpulin që u kthye në fushë në fraksionin e dytë më I vendosur dhe më këmbëngulës në kërkim të golit, gol që erdhi në mënyrë rokamboleske, pasi krosimi I Henderson i devijuar nga Estupinjan dhe më pas përfundoi në rrjetën e Rullit.
Mirëpo ende me tifozët në këmbë në dëlir për avantazhin, Liverpol nën shenjën e entuziazmit e fundosi përfundimisht nëndetësen falë një kombinimi Salah-Mane, me këtë të fundit që çoi topin në rrjete.
Vetëm pas këtij avantazhi sigurie, anglezët ulen xhirot e motorit dhe ishin më ekonomike në administrimin e rezultatit, duke shkuar në Spanjë me garancinë e një rezultati të pastër.
Ndërsa iberikët që mbajnë mbi supe njollën e zezë të zero gjuajtjeve në kuadrat në Anfield, mund të shpresojnë vetëm duke u nisur nga e kaluara e afërt, fakti që në fushën e tyre nënshtruar as më pak e as më shumë, por Bajernin e Mynihut. Në fund të fundit, të ëndërrosh nuk është asnjëherë një gjë e keqe.
