Liverpool fiton gjysëmfinalen e parë, “të kuqtë” mundin Fulham 2 me 1 në Kupën e Ligës

Liverpool fitoi aktin e parë të gjysmëfinales së kupës duke mundur 2 me 1 në shtëpi Fulham.

Sukses që i jep një avantazh jo të vogël skuadrës së Jurgen Klop në kuadër të takimit të kthimit që do të luhet në transfertë.

Ndeshje me dy pamje në Anfilld.

Në pjesën e parë vendosi një gol i shënuar nga Uillian për Fulham në minutën e 19, pas një topi të shërbyer nga Perreira.

Vetëm një gjuajtje nga distanca e Xho Gomez ishte shumë pak për të zotët e shtëpisë në këtë pjesë. Liverpooli ishte një tjetër ekip në pjesën e dytë duke sulmuar me më shumë intensitet e duke krijuar më tepër raste për shënim.

Pas një mundësie të mirë të Gakpo, ishte Xhons që barazoi me një gjuajtje nga distanca favorizuar edhe nga një devijim i topit. Vetëm 3 minuta më vonë, në të 71 ishte Gakpo që shënoi golin e fitores, pasi u shërbye saktë nga e majta përmes Darvin Nunjez.

Deri në fund të kuqtë patën mundësi për të thelluar rezultatin, por portieri i miqve, gjermani Bernd Leno ishte i pakalueshëm. Takimi i kthimit do të luhet në 24 janar./vizionplus.tv