Votimi në kuvend i ligjit të gjuhëve një ditë më parë ka shkaktuar tensione dhe përplasje në politikën maqedonase.
Pavarësisht detyrimit kushtetues, kreu i shtetit refuzon të nënshkruajë dekretin për një ligj të miratuar me shumicë votash për herë të dytë. Disa thonë se ligji duhet të botohet automatikisht në Fletoren Zyrtare, ndërsa për shumë të tjerë, pa firmën e presidentit ligji nuk ka forcë veprimi.
“Kushtetuta dhe ndërgjegjja nuk më lejojnë të nënshkruaj një dekret per një ligj të tillë” u shpreh Ivanov në një përgjigje me shkrim pas miratimit te ligjit. Shumica e qytetarëve kurrë nuk kanë votuar, as nuk do të votojnë kurrë një program politik që parasheh një ligj antikushtetues, antishtetëror dhe në thelb të padrejtë” theksoi Ivanov.
Sipas nenit 75 të Kushtetutës së Republikës së Maqedonisë, pas kthimit të parë të ligjit në Kuvend, deputetët e shqyrtojnë atë dhe, nëse miratohet me shumicën e votave të numrit të përgjithshëm të deputetëve, Presidenti është i detyruar që ta nënshkruajnë dekretin.
Ndërkohe VMRO-DPMNE ka reaguar duke thëne se qeveria nuk mori parasysh sugjerimet e kryetarit të shtetit, të ekspertëve, të qytetarëve dhe të aktorëve të tjerë politikë dhe votoi kundër Kushtetutës. VMRO-DPMNE nuk e njeh këtë ligj dhe do të ngrejë padi penale kundër Talat Xhaferit me akuzën se shumica në pushtet përdhunoi demokracinë.
