Presidenti i Shteteve të Bashkuara të Amerikës, Donald Trump, në një deklaratë për mediat është shprehur se libri i Majkell Vulf, që flet për administratën e tij, është i mbushur me gënjeshtra.
Sipas Trump, libri i titulluar “Zjarr dhe Furi”, dhe që del në shitje në gjithë Amerikën këtë të premte, përmban gënjeshtra, keqinterpretime dhe burime të cilat nuk ekzistojnë.
Por, çfarë tregon botimi i cili ka shkaktuar trazira në Shtëpinë e Bardhë?
Libri citon ish-ndihmësin më të besuar të Trump, Steve Bannon, duke përshkruar një takim të djalit të presidentit me një grup rusësh. Sipas Bannon, një takim i tillë është “tradhti” për vendin.
Një ditë më parë, Trump tha se kryestrategu Bannon, jo vetëm që humbi punën kur u shkarkua nga detyra në Shtëpinë e Bardhë, por edhe mendjen.
Libri gjithashtu e portretizon Trump si të habitur kur u shpall fitorja presidenciale. Ai përshkruan ekipin e tij të tronditur nga rezultati, që mesa duket, nuk e prisnin. Bashkëshortja e Trump, sot Zonja e Parë e SHBA-se, kishte lot dhe trishtim natën e fitores.
Libri thuhet se bazohet në më shumë se 200 intervista brenda administratës dhe vetë presidentit, por disa nga fragmente të tij janë vënë në pikëpyetje. Trump mohon fuqishëm se ka folur me dikë për një libër të tillë. Madje ai nuk ka pranuar të takohej me Majkell Vulf, autorin e librit, në Shtëpinë e Bardhë.
