“Lia e majmunëve” është një sëmundje e rrallë infektive që është përhapur ditët e fundit në Evropë, shtetet e bashkuara si dhe në lindjen e mesme. Kjo sëmundje është raportuar më herët vetëm në Afrikën Qendrore dhe atë Perëndimore, ndërsa aktualisht janë konfirmuar rreth 80 raste në Belgjikë, Francë, Gjermani, Itali, Portugali si dhe në vende të tjera të Evropës.
Por shkencëtarët nuk presin qe ky virus të përhapet sikurse koronavirusi, pasi lia e majmunëve mund të transmetohet vetëm në raste të kontaktit shumë të afërt. Ajo shkakton simptoma të lehta, të karakterizuara me temperaturë dhe skuqje në trup.
Por Organizata Botërore e Shëndetësisë i ka konsideruar këto raste si të pazakonta pasi janë evidentuar të personat që nuk kanë udhëtuar në Afrikë si dhe janë duke u identifikuar te burrat homoseksualë.
“Teksa hyjmë në periudhën e verës në rajonin evropian, me festa masive, festivale dhe ndenja të ndryshme, jam i shqetësuar se përhapja mund të rritet. Shumica e rasteve të identifikuara kanë qenë tek burrat homoseksualë ose biseksualë që kanë kryer marrëdhënie me njëri-tjetrin. Rastet janë identifikuar në klinikat e shëndetit seksual, ndërsa simptomat janë ende të panjohura për shumicën e tyre” -tha Hans Kluge, Drejtori i OBSH për Europën.
Shkalla e vdekshmërisë nga kjo sëmundje është e ulët, ndërsa vaksinat kundër llojeve tjera të lisë besohet se ofrojnë mbrojtje nga ky virus.
Lia e majmunëve konsiderohet endemi në Republikën Demokratike të Kongos, ku është zbuluar për herë të parë në njerëz në vitin 1970.
