Teatri Kombëtar i Operës dhe Baletit po përgatitet të sjell në skenë një nga ngjarjet më të veçanta artistike të muajit shkurt. Për katër net radhazi, opera lirike “Elisiri i dashurisë” e Gaetano Donizettit vjen si një premtim për të bërë publikun përjetojë dashurinë përmes kësaj premiere.
Kjo vepër e njohur, e mbushur me nota komike dhe romantizëm, rikthehet në një produksion krejtësisht të ri, duke nisur nga skenografia dhe kostumografia, deri te çdo detaj i ndërtuar posaçërisht për këtë shfaqje.
Një lexim bashkëkohor skenik e zhvendos veprën në një fshat piktoresk bregdetar, duke i dhënë operës një atmosferë mesdhetare dhe një ndjeshmëri të freskët.
““L’Elisir d’Amore” është një histori e thjeshtë, por thellësisht njerëzore, ku dashuria, naiviteti dhe shpresa marrin jetë përmes muzikës plot dritë të Donizettit. Produksion synon të komunikojë drejtpërdrejt me publikun, duke ruajtur frymën lozonjare të komedisë lirike dhe duke e sjellë veprën më pranë ndjeshmërisë së sotme”, tha regjisori Riccardo Canessa.
Në këtë produksion, skena e TKOB bashkon emra të spikatur të skenës shqiptare dhe asaj ndërkombëtare, të ndarë në dy kaste interpretësh. Baritoni i mirënjohur Gëzim Myshketa rikthehet në skenë me rolin e Dulcamarës, duke e sjell këtë shfaqjeje jo thjesht si një trill skenik, por simbol i besimit në dashurinë e sinqertë dhe në fuqinë e ëndrrës.
Drejtori i Teatrit Kombëtar të Operës dhe Baletit, Aulon Naçi, thekson se “L’Elisir d’Amore” vjen si një dhuratë për publikun gjatë muajit të dashurisë dhe nënvizon rëndësinë e këtij produksioni.
Pa një recetë sekrete për elisirin e dashurisë, por me muzikë, humor emocion, TKOB ju fton nga data 11 deri ne 14 shkurt në orën 19.00./vizionplus.tv
