Ai ishte një nga kantautorët më brilant të muzikës shqiptare. Françesk Radi do të kujtohet si artisti i dimensioneve të mëdha, i cili i dha muzikës shqiptare një tjetër hov. I cilësuar si Çelentanoja shqiptar, ai ishte unik në stilin e tij. I pandarë nga kitara, Françesk Radi i dhuroi muzikës shqiptare jo vetëm hite, por firmën unike të një arti që vetëm ai dinte ta bënte. Sot e në vazhdim do ti mungojë familjes, publikut dhe muzikës shqiptare, ai është një nga figurat më përfaqësuese të evolimit të saj.
Javën e kaluar në mënyrë fare të papritur, kantautori u shtrua në spitalin “Nënë Tereza” në gjendje të rëndë shëndetësore. Pas ekzaminimeve mjekët lajmëruan se gjendja e tij ishte shumë e rëndë, si pasojë e një hemoragjie masive në tru. Ishte i menjëhershëm reagimi i bashëshortes së tij, Tefta Radi, e cila kërkonte ndihmën e shtetit shqiptar, për ekzaminim më të specializuar jashtë kufijve të Shqipërisë. Edhe pse ishte i menjëhershëm reagimi i të gjitha instancave shtetërore, mjekët nuk lejuan dërgimin e kantautorit jashtë vendit, pasi një gjë e tillë nuk mund të suportohej nga artisti, si pasojë e gjendjes së rëndë.
Sot, edhe pse lutjet për Françeskun u bënë nga i madh e i vogël, nga të rinj e të vjetër, nga artistë dhe qytetarë të thjeshtë, artisti i madh ndaloi së marri frymë dhe nuk mundi ta mposhte sëmundjen e rëndë, në moshën 67-vjeçare.
Por shpirti i një artisti nuk shuhet kurrë dhe Françesk Radi do të flasë gjithmonë me muzikën e tij dhe gjurmët e thella që la në muzikën shqiptare.
