Gjatë 24 orëve të fundit janë shënuar 4 raste të reja me koronavirus, nga 121 teste të kryera. Kjo është shifra më e ulët në 8 javët e fundit në Shqipëri. Ndërkohë, në total regjistrohen 872 qytetarë me koronavirus.
Mjekja Eugena Tomini deklaroi këtë të hëne se janë shëruar 4 pacientë të tjerë nga koronavirusi. Ndërkohë, 187 pacientë janë të sëmurë aktivë me COVID-19; kryesisht ne Tiranë, Krujë, Shkodër, Kamëz.
“Bazuar në të dhënat e deritanishme vlerësohet se numri efektiv i riprodhimit nga data 24 prill e në vazhdim ka zbritur nën kufirin kritik (për R < 1). Sot është numri më i ulët i rasteve ditore pozitive, e përllogaritur në 8 javët e fundit. Në 24 orët të fundit janë testuar 121 qytetarë të dyshuar si të prekur me Covid-19 dhe kanë rezultuar pozitivë 4 qytetarë, përkatësisht 2 qytetarë në Tiranë, 1 në Kamëz dhe 1 në Shkodër. Të shëruar janë 4 qytetarë. Deri më sot janë konfirmuar pozitivë me COVID-19 në të gjithë vendin 872 qytetarë. 654 qytetarë janë shëruar, ose 75% e të gjithë të prekurve.”
Situata në spitale paraqitet e qëndrueshme prej ditësh, tha Tomini. Aktualisht në dy spitalet COVID janë shtruar 28 pacientë, 3 prej të cilëve ndodhen në terapi intensive. Me pak se 15% e te prekurve aktivë po marrin trajtim në spitalet Covid, pjesa tjetër ndiqet nga mjeku i familjes.
“Nga fillimi i epidemisë, deri tani, në vendin tonë janë kryer 11089 testime, nga të cilat, 10559 janë testime molekulare dhe 530 janë testime serologjike. Pavarësisht lehtësimit të masave, Ministria e Shëndetësisë dhe Mbrojtjes Sociale i fton qytetarët të respektojnë rregullat, të ruajnë distancimin fizik dhe higjienën personale; bizneset të zbatojnë protokollet e sigurisë për të ruajtur shëndetin e qytetarëve. Testime totale 11089. Testime molekulare 10559. Testime serologjike 530. Raste pozitive 872. Raste të shëruara 654. Raste Aktive 187. Humbje jete 31 (Qarku Tiranë 18, Durrës 6, Fier 3, Vlorë 1, Shkodër 2, Kukës 1).”
