I dërguari i Bashkimit Europian për dialogun Kosovë Serbi, Miroslav lajçak u takua në Prishtinë me krerët dy partive më të mëdha opozitare si dhe Ramush Haradinaj, kryetar i Aleancës për Ardhmërinë e Kosovës.
Kryetari i Partisë Demokratike, Memli Krasniqi bëri të ditur pas takimit se Lajçak kishte konfirmuar që drafti i asosiacionit ishte në përputhje me kushtetutën e Kosovës por se nuk ishte njohur me përmbajtjen .
MEMLI KRASNIQI
KRYETAR I PDK
“Ne kemi nevojë t’i shohim hollësitë e tekstit për të qenë të sigurt se një themelim i Asociacionit nuk do ta ndryshojë për të keq karakterin unitar të shtetit tonë dhe nuk do ta transformojë republikën e Kosovës nga idealet e themeluesve të këtij shteti.”
Ndryshe nga opzitarët e tjerë kreu i Aleancës për Ardhmërinë e Kosovës, Ramush Haradinaj u shpreh se e ka parë draftin e moderuar të BE.
RAMUSH HARADINAJ
KRYETAR I AAK
“E kemi lexuar draft statutin në tërësi. Ai shpjegon të gjitha mundësitë që Asociacioni ua ofron komunave me shumicë serbe, kuptohet, çdo herë duke iu Kushtetutës dhe ligjeve të Kosovës.”
Lajçak u takua dje edhe me zëvendëskryeministrin Besnik Bislimi, me të cilin tha se u dakordesuan për hapat e ardhshëm dhe për zbatimin e plotë, pa vonesa e parakushte të marrëveshjes për normalizimin e marrëdhënieve mes Kosovës e Serbisë.
Ndërsa Bislimi u shpreh se Kosova mbetet e përkushtuar ne normalizim të plotë të marrëdhënieve me Serbinë dhe për njohje reciproke.
Vizita e papritur e Laçak në Kosovë vjen pas takimeve të fundit te Kurtit dhe Vucic me udheheqesit europiane në Bruksel. Nuk dihet ende nëse i dërguari i BE do të takohet me kryeministrin Albin Kurti.
