Ministri i Jashtëm i Sllovakisë Miroslav Lajçak është emëruar si Përfaqësues Special i Bashkimit Europian për dialogun Kosovë-Serbi.
Burime nga Brukseli të cituara nga radio Evropa e Lirë bëjnë të ditur se propozimi formal i Lajçak ka qenë edhe arsyeja e bisedave telefonike që Borrell ka zhvilluar të premten me presidentin e Serbisë, Aleksandar Vuçic, presidentin e Kosovës, Hashim Thaçi, dhe kryeministrin e Kosovës, Albin Kurti.
Zyra e Borrell konfirmoi se ai diskutoi me ta vendimin për të emëruar një Përfaqësues Special për Dialogun.
“Përfaqësuesi i Lartë nënvizoi se ky emërim pasqyron rëndësinë që BE dhe ai personalisht i kushtojnë rajonit, stabilizimit dhe përparimit në rrugën integrimit. Josep Borrell kujtoi se ai mbetet personalisht i angazhuar dhe i përkushtuar fuqimisht për të mbështetur perspektivën europiane të Ballkanit Perëndimor dhe për të luajtur rolin e tij si lehtësues i Dialogut Beograd-Prishtinë.” thuhet në deklaratën zyrtare.
Pritet që emërimi i Miroslav Lajçak në detyrën e re të bëhet më 23 mars, në takimin e ministrave të Jashtëm të vendeve të Bashkimit Europian dhe për këtë duhet miratimi i të gjitha vendeve anëtare. Vendimi përfundimtar jepet nga këshilli i ministrave të BE.
Lajçak ka përvojë të gjatë në rajonin e Ballkanit. Ai ka qenë ambasador i Sllovakisë në Serbi dhe Mal të Zi. Më tej është emëruar i dërguar evropian për referendumin për pavarësi të Malit të Zi dhe ka shërbyer si përfaqësues i lartë ndërkombëtar në Bosnje dhe Hercegovinë.
