Teuta, Laçi dhe Kukësi i japin fund aventurës europiane.
Verilindorët nuk mundën dot të surprizonin në Tiranë, Volfsburgun teksa humbën me rezultatin e thellë 4-0. Miqtë treguan dhëmbët që në fillim, duke shënuar dy gola të shpejtë, që lanë pasoja tek skuadra e Gegës.
Mundësia e artë e Kukësit për të rihapur ndeshjen ishte një penallti e ekzekutuar nga Rroca , por portieri gjerman arriti ta devijojë mjaft mirë. Në fraksionin e dytë të lojës Kukësi provoi të bënte diçka dhe iu afrua golit me Gashin, i cili goditi shtyllën. Pas kësaj gjermanët nuk falën dhe shënuan dhe dy gola të tjerë, duke mbyllur sfidën 4-0.
Laçi nga ana tjetër shihej si një nga favoritet kryesorë për tu kualifikuar, duke parë dhe kundërshtarin që kishte përballë: por edhe kurbinasit dështuan. Sfida nisi mirë për skuadrën e Cungut, që ishte më kërkuese në fushë.
Ndërsa goli i avantazhit erdhi në pjesën e dytë me golashënuesin e skuadrës Nuabueze. Pavarësisht paraqitjes së mirë të Laçit, presioni i madh i Hapoel nuk u mbajt dot nga kurbinasit që pësuan dy gola në tre minutat e fundit dhe mbyllën sfidën me rezultatin 1-2. Pas kësaj disfate tekniku Cungu tha se ishte i kënaqur me skuadrën edhe pse fati i tradhtoi në fund.
ARMANDO CUNGU
TRAJNER I LAÇIT
“Ndihemi keq. Na iku ndeshja në tre minutat e fundit. Megjithatë futbolli kështu e ka. Zhvilluam një lojë të mirë me shumë raste, ndërsa në fund ata na mundën me dy gola. Ndoshta duhet të ishim pak më të kujdesshëm në disa momente. Nuk mund të parashikosh asgjë në futboll. Jam i kënaqur me skuadrën, me lojën që ata bënë në fushë. Shohim përpara.”
Më herët edhe Teuta nuk arriti të bënte dot surprizën teksa u mund nga gjigandët e Grandës në shifrat 0-4. Spanjollët u treguan që në fillim superioë në takim duke shënuar 2 gola të shpejtë me Soldadon dhe Kenedi . Dominimi i frikshëm i spanjollëve bëri që të shënonin dhe dy herë të tjera me protagonist Hererën.
Rasti i vetëm i rrezikshëm për skuadrën durrsake ishte për Lorenco Vilën. Gjërat u përkeqësuan dhe me shumë kur Beqja mori dhe kartonin e dytë të verdhë dhe la skuadrën me 10 lojtarë.
Ndërsa dy ekipet shqiptare që kaluan në raundin tjetër janë Shkëndija e Tetovës dhe Drita e Gjilanit. Skudra e Gjokës fitoi 1-0 ndaj rumunëvë të Botoshan , me golin e Besart Ibraimit. Tashme skuadra kualifikohet në raundin tjetër ku e pret një sfidë mjaftë e vështirë përballë gjigandëve të Tottenhem .
Ndërsa Drita mundi 2-0 Sileksin e Maqedonisë së Veriut ndërsa kundërshtari që i pret në turin tjetër është skuadra e Legias në Poloni .
