Tre nga të arrestuarit pas zbulimit të laboratorit të heroinës në fshatin Brenog të Hasit kanë mbetur në burg ndërsa dy të tjerë kanë marrë masën e sigurisë arrest shtepie dhe detyrim paraqitje.
Gjykata e Kukësit ka dhënë masën “arrest me burg” për Xhevit Shutin, Flamur Çelën, Vehbi Barushin, ndërsa “arrest shtëpie” për Mustafë Shutin dhe “detyrim paraqitje” për Anila Shutin.
Caktimi i masës u bë nga gjyqtari Rexhep Karaj, ndërkohë që prokurori i çështjes, Etmond Karriqi kërkoi ‘arrest me burg’ për të 5 të ndaluarit e këtij rasti, të cilët akuzohen për posedim, përpunim e trafikim të lendeve narkotike në bashkëpunim. Mbrojta e të pandehurve është marrë përsipër nga avokatet Aurora Guska e Domenika Gjergji.
Sipas policisë në këtë operacion janë vënë në pranga 6 persona, një prej të cilëve biznesmen turk si dhe 3 prej të cilëve nga familja Shuti, në banesën e të cilëve u gjet laboratori i drogës.
Gjithashtu gjatë këtij operacioni janë sekuestruar një sasi prej 182.5 kg morfinë, e ndarë në 175 pako, 22 litra lëndë e lëngshme, të cilat përdoreshin për prodhimin e heroinës.
