Kryesia e Kuvendit të Kosovës shqyrton sot projektligjin për kthimin e FSK-së në ushtri.
Drafti në fjalë iu dorëzua kryeparlamentarit Kadri Veseli nga vetë Presidenti Hashim Thaci një ditë më parë, i cili deklaroi se ka ardhur koha dhe ekzistojnë të gjitha kapacitetet që Forca e Sigurisë së Kosovës të kthehet në Ushtri.
I menjëhershëm ka qenë reagimi i palës serbe. Kryeministri serb është përplasur ashpër me presidentin Thaçi gjatë një bisede telefonike. Mësohet që Vucic të ketë thënë se formimi i ushtrisë do të sjellë paqëndrueshmëri në rajon.
Ndërsa ministri i jashtëm i Serbisë, Ivica Daçiç gjatë një konference për gazetarë ne Beograd tha se Serbia do të kundërshtojë formimin e Ushtrisë së Kosovës pasi që sipas tij kjo nuk është as në pajtim me rezolutën 1244 të Këshillit të Sigurimit të Kombeve të Bashkuara.
