Kuvendi i Shqipërisë ka nisur këtë të hënë seancën plenare, e cila zhvillohet vetëm me praninë e deputetëve të mazhorancës, pasi opozita ka vendosur ta bojkotojë, ashtu siç ishte paralajmëruar më herët.
Kryetari i Kuvendit, Niko Peleshi, prezantoi rendin e ditës, i cili përfshin shqyrtimin e një sërë projektrezolutash për vlerësimin e veprimtarisë së institucioneve të pavarura gjatë vitit 2025.
Ndër çështjet kryesore në axhendë janë raportet për Komisionin Qendror të Zgjedhjeve, Inspektoratin e Lartë të Deklarimit dhe Kontrollit të Pasurive dhe Konfliktit të Interesave (ILDKPKI), si dhe Bankën e Shqipërisë.
Seanca do të trajtojë gjithashtu veprimtarinë e Autoritetit të Mbikëqyrjes Financiare, INSTAT-it, Autoritetit të Komunikimeve Elektronike dhe Postare (AKEP), Radiotelevizionit Shqiptar (RTSH), Autoritetit të Mediave Audiovizive (AMA), Entit Rregullator të Energjisë (ERE) dhe Entit Rregullator të Ujit.
Në përfundim të punimeve janë parashikuar diskutime mbi çështje të evidentuara nga zgjedhësit, ku deputetët do të trajtojnë problematikat e ngritura nga qytetarët në zonat e tyre.
/vizionplus.tv
