Kryesia e Kuvendit të Kosovës ka thirrur për të martën seancën e jashtëzakonshme për procesin e dialogut me Serbinë.
Debati parlamentar është thirrur me kerkesën e opozitës në lidhje me siç thuhet “angazhimet e Presidentit të Kosovës për përfshirjen e ‘shkëmbimit të territoreve’ apo ‘korrigjim të kufijve’ në dialogun në mes të Kosovës dhe Serbisë”.
Kerkesa ne menyre te vecante per seance u be nga Lidhja Demokratike e Kosovës, e mbështetur edhe nga grupet tjera politike në opozitë.
Kryetari i Kuvendit, Kadri Veseli, pas mbledhjes së Kryesisë tha se qëndrimet e tij politike rreth kësaj çështjeje do t’i bëj publike gjatë seancës të së martës.
Presidenti i Kosovës, Hashim Thaçi dhe homologu i tij serb, Aleksandar Vuçiq do të zhvillojnë raundin e ri të bisedimeve 7 shtator. Të dy presidentët, kohët e fundit kanë folur për mundësinë e korrigjimit te kufijve mes dy shteteve, e cila, sipas presidentit Thaçi, mund të jetë pjesë e marrëveshjes eventuale të paqes mes Prishtinës dhe Beogradit.
Thaçi ka premtuar gjate javeve te fundit se në dialog do të flasë edhe për mundësinë e bashkimit të Preshevës, Medvegjës dhe Bujanocit me Kosovën.
