Ndonëse doli i humbur nga zgjedhjet e 13 qershorit brenda Partisë Demokratike, Fatbardh Kadilli do të vijojë betejën e tij për shndërrimin e partisë.
Anëtari i Kryesisë së PD-së tha në studion e “7 pa 5” në “Vizion Plus” se PD-ja duhet të kthehet në një parti antikorrupsion. Ai zbuloi edhe se nuk e ka uruar Lulzim Bashën për fitoren, për faktin se ishte një garë e pabarabartë.
“Pavarësisht rezultatit në 13 qershor, sfidë kam shëndërrimin e PD në një parti demokratike me vlera. Nuk duam një parti të krijuar 30 vjet më parë si partia e antikomunizmit, sot duam partinë e antikorrupsiuonit. Për të uruar, nuk e kam uruar, nuk e uroj sepse nuk e quaj garë të barabartë. Pabarazia në garë është një gjë që unë e njihja. Më i rëndësishëm se rezultati ishte sfida për të legjitimuar mendimin politik. Asnjë demokrat nuk mund të thotë se nuk kishte asnjë mundësi zgjedhjeje. E humbën shansin që këto të ishin zgjedhje me standardet më të larta, por arritëm të krijojmë një sesn të ri gare.”
Që të arrijë transformimin e PD-së, por edhe të mënyrës sesi bëhet politikë, Fatbardh Kadilli renditi përballë gazetarit Thimi Samarxhiu një sërë propozimesh:
“Përveç ndryshimeve statuore, duhet të flasim që sot për një Kushtetutë të re, të balancuar për një Kod Zgjedhor Për një ndarje të re administrative territoriale të vendit që u shërben qytetarëve dhe për reformën në drejtësi. Nuk mund ta lëmë reformën në drejtësi si një mall që io përket tjetërkujt, ne nuk e dizenjuam vetë, por duhet ta ushqejmë me moral. Nuk ka aleat më të mirë për opozitën sesa drejtësia që ndëshkon korrupsionin.”
Opozita, sipas tij, duhet të jetë në Parlament dhe çdo betejë ta bëjë në rrugë institucionale, me propozime konkrete.
