Ish-kreu i Bindjes Demokratike, Astrit Patozi e ka cilësuar si “fundin e pritshëm të një marrëzie politike” vendimin e Gjykatës Kushtetuese për të certifikuar zgjedhjet vendore të 30 qershorit.
Ai e konsideroi një aventurë të rrezikshme që përfundoi me një kosto shumë të lartë veçanërisht për Partinë Demokratike.
“FUNDI I PRITSHËM I NJË MARRËZIE POLITIKE. Fundi i pritshëm i një marrëzie politike, konsumuar gjatë kohës kur “Foltorja” dhe vulëmbajtësit e partisë mendonin dhe vepronin njësoj. Një aventurë e rrezikshme, e cila përfundoi me një kosto shumë të lartë për të gjithë opozitën, por veçanërisht për Partinë Demokratike. Do të habitesha shumë, nëse dikush nga palët ndërluftuese do të shprehte sot pendesë apo reflektim, pas vendimit të së vetmes gjykatë në Shqipëri, e cila, të paktën deri tani, nuk konsiderohet ende si e kapur nga pushteti. E cila, në fakt, nuk ka bërë ndonjë gjë më shumë, se sa ka përkthyer fermanin e ashpër dhe të qartë të Komisionit të Venecias. Një provë e tërthortë se sot nuk po kacafyten për parime apo për marrje përgjegjësish ndaj dëmeve serioze që i kanë shkaktuar kauzave opozitare, por thjesht dhe vetëm për pronësinë e Partisë Demokratike. Tani e kanë të mbyllur një herë e përgjithmonë atë shteg. Sepse e kanë të shkruar si në pllakë të varrit, se jo vetëm nuk mund ta përsërisin më atë eksperiment të çmendur, por as nuk mund të guxojnë ta çojnë atë nëpër mend.”
“Kushtetuesja” vendosi sot të rrëzonte kërkesën e kryetares së bashkisë së Shkodrës, Voltana Ademi për shpalljen antikushtetues të zgjedhjeve vendore të 30 qershorit të vitit 2019. Vendimi i gjykatës erdhi pas dy opinioneve të Komisionit të Venecias.
