Ndërsa kriza politike në Maqedoni kishte hyrë dhe në një ngërç ligjor, Gjykata Kushtetuese ka votuar unanimisht pro shqyrtimit të kërkesës së Partisë Bashkimi Demokratik për Integrim lidhur me kushtetutshmërinë e shpërndarjes së Parlamentit në Maqedoni. Me këtë miratim, deri në vendimin përfundimtar të Gjykatës Kushtetuese, pezullohen të gjitha aktivitetet zgjedhore, për procesin e 5 qershorit, të kontestuar nga opozita në vend. Sikurse bëhet me dije BDI, një nga dy partitë që votuan pro shpërndarjes së parlamentit dhe çuarjen e vendit në zgjedhje pavarësisht se nuk ishin plotësuar të gjitha kushtet për mbajtjen e tyre, ka kërkuar vlerësimin nëse kjo është në përputhje me Kushtetutën apo jo. I menjëhershëm ka qenë reagimi i liderit të BDI-së Ali Ahmeti, i cili në një koment në Facebook ka thënë se ky është hapi i parë i zgjidhjes së ngërçit ligjor, që mund të sjellë dhe zhbllokimin e krizës politike në Maqedoni. Me heret, zyrtarë të VMRO-DPMNE, përfshi dhe ish kryeministrin Gruevski kanë deklaruar se do të hyjnë të vetëm në zgjedhjet e 5 qershorit pasi nuk ekziston baza ligjore për shtyrjen e tyre. Opozita bojkotoi këtë proces ndërsa ndërkombëtaret paralajmëruan se nuk do të njohin rezultatin e tyre.