Kritikat e liderit demokrat, Lulzim Basha për menaxhimin e pandemisë nga qeveria nuk ishin të pakta. Ai pati ankesa për numrin e testimeve, kushtet në të cilat punojnë mjekët e infermierët, gjurmimin e rasteve.
“Trajtimet me COVID bëhen vetëm në Tiranë dhe aspak në rrethe. Nuk ka gjurmim të rasteve. Nuk trajtohen rastet. Testimet janë të ulëta. Nuk bëhet ndjekja e pacientit, nuk ka analiza gjaku, nuk ka skaner, mjekimet nuk rimbursohen dhe ka mungesë totale të aparaturave në dy spitalet COVID. Vazhdon ikja e mjekëve dhe infermierëve, për shkak të kushteve mizerable. Paketa e 1000 euro për mjekë ka qenë jo e plotë. Sot mjekët janë të diskriminuar dhe të keqpaguar, edhe në raport me fqinjët”, tha Lulzim Basha në një takim me mjekët dhe ekspertët e shëndetësisë.
Ai propozoi që të nisë menjëherë testimi i popullatës kundër gripit sezonal, me qëllim që të shmanget mbivendosja me pacientët me koronavirus.
“Që nga korriku kemi thënë që duhet të nisë vaksinimi masiv i popullsisë kundër gripit sezoinal. Jemi në limitet kohore, por sasi aprej 200 mijë vaksinash është e pamjaftueshme edhe nëse është e vërtetë dhe u dedikohet atyre që janë në kontakt dhe më të rrezikuar. Mësuesit në Kosovë janë testuar, ndërsa këtu kërkesës tonë nuk ju vu veshi.”
