Dhjetëra mijëra njerëz kanë nënshkruar një peticion për të kërkuar dëbimin e të dashurës së përfolur të Vladimir Putinit, ish-gjimnastes Alina Kabaeva, nga Zvicra. Peticioni e përshkruan Kabaevan si “gruaja e një diktatori delirant” dhe thotë se “Eva Braun u kthye te Führeri i saj”. Mbi 56,000 njerëz e kanë nënshkruar atë deri më tani. E dashura e Vladimir Putin dyshohet se fshihet në një shtëpi private në Zvicër së bashku me katër fëmijët e tyre të vegjël. Gjimnastja, fituese e medaljes së artë në Lojërat Olimpike, raportohet se ka 4 fëmijë me Presidentin Putin. 38 vjeçarja dhe Putin mendohet se kanë 2 djem dhe dy vajza binjake 7-vjeçare, të cilët kanë pasaportë zvicerane. Romanca mes atletes dhe presidentit rus u përfol për herë të parë në vitin 2008. Në vitin 2015 raportohet se ishte shtatzënë me liderin rus. Kabaeva ka marrë 2 medalje olimpike, 14 medalje të Kampionatit Botëror dhe 25 medalje të Kampionatit Evropian. Kabaeva, 38 vjeç, tërhoqi vëmendjen e shtypit zviceran dhe atij ndërkombëtar në vitin 2015, kur thuhet se lindi një vajzë në qytetin italisht-folës të Luganos, në kantonin zviceran të Ticino. Putin besohej gjerësisht se ishte babai i fëmijës. Një anëtare e parlamentit rus, Duma e Shtetit, për partinë pro-Kremlin Rusia e Bashkuar nga viti 2007 deri në 2014, Kabaeva mbrojti ligjet e Rusisë kundër “propagandës së homoseksualëve” dhe ligjin e diskutueshëm Dima Yakovlev, i cili ndalonte birësimin jashtë shtetit të fëmijëve rusë.

Peticioni për dëbimin e Kavaevës nga Zvicra dhe sanksionet ndaj Rusisë

Peticioni, i publikuar në faqen e internetit change.org në frëngjisht, gjermanisht dhe anglisht, kërkon që e drejta e Kabaeva për të banuar në Zvicër të hetohet “me shumë kujdes”. Aty thuhej: “Ju lutemi vendosni nëse qëndrimi i këtij individi në vendin tuaj është i garantuar”. “Ne ju kërkojmë gjithashtu të kontrolloni ‘pastërtinë’ e mjeteve të përdorura për blerjen e pasurive të paluajtshme në Zvicër, nga të cilat ky person përdor”. Zvicra, tradicionalisht neutrale dhe një vrimë e favorizuar e elitës ruse, iu bashkua papritur sanksioneve të Bashkimit Evropian kundër Moskës pas pushtimit të Ukrainës. Vendi vendosi kufizime në një varg bankash dhe oligarkësh rusë, si dhe ngriu një pjesë të rezervave valutore të Moskës të mbajtura në franga zvicerane.

Kush është Alina Kabaeva?

Kabaeva, tani 38 vjeç, fitoi medaljen e bronztë në lojërat Olimpike 2000 në Sidnej, duke u përmirësuar në të artë në të njëjtën kategori në lojërat e Athinës 2004. Duke qenë e fejuar me policin David Museliani deri në ndarjen e tyre në 2005, raportet e viteve të fundit sugjerojnë se ajo është përfolur se është partnerja afatgjatë e Putinit – dhe se ajo ka pasur tre fëmijë në shtatë vitet e fundit. Sigurisht që raporte të tilla janë të pamundura për t’u verifikuar me Kremlinin, por sipas Spectator një medium u mbyll në Moskë sepse e përshkruan atë në 2008 si dashnoren e tij. Deklarata e saj e vitit 2021 erdhi dy vjet pasi ajo u pa për herë të fundit në publik, me raporte që thanë se ajo lindi djem binjakë në klinikën e maternitetit Kulakov të Moskës në vitin 2019, pasi kishte një vajzë në vitin 2015. Kabaeva fitoi gjithsej 14 medalje të Kampionatit Botëror dhe 21 medalje të Kampionatit Evropian gjatë karrierës së saj vezulluese dhe ishte një mbajtëse e pishtarit në Lojërat Olimpike Dimërore të Soçit 2014.

Si e ka komentuar Putin këtë marrëdhënie?

Vetë Presidenti Vladimir Putin ka thënë më parë: “Unë kam një jetë private në të cilën nuk lejoj ndërhyrje. Ajo duhet respektuar”. Udhëheqësi rus ka një interes të madh për sportet, pasi është parë duke luajtur hokej mbi akull dhe futboll në të kaluarën, dhe thuhet se i kushton dy orë në ditë qëndrimit aktiv. Putin, i cili shërbeu si president i Rusisë nga viti 1999 deri në vitin 2008 – dhe përsëri që nga viti 2012 pas një periudhe si kryeministër, ishte martuar për herë të parë në vitin 1983. Ish-agjenti i KGB-së u martua me Lyudmila Shkrebneva dhe ata jetuan së bashku në Gjermaninë Lindore nga 1985 deri në 1990. Ata kishin dy vajza së bashku, Mariya Putina e lindur në Leningrad në 1985, si dhe Yekaterina Putina, e cila lindi në Dresden vitin e ardhshëm. Ata e bënë publik divorcin e tyre pas 30 vitesh martesë në vitin 2014, me Putinin duke thënë: “Ishte një vendim i përbashkët: ne nuk e shohim njëri-tjetrin, secili prej nesh ka jetën e tij”.

Kush ishte gruaja e Hitlerit, Eva Braun/ Si e ushtroi pushtetin e saj në prapaskenë

Pas Luftës së Dytë Botërore, shumë historianë e përshkruan Braun si një “bjonde memece”, që luajti një rol të parëndësishëm në histori. Por në shumë aspekte, Braun ishte ithtarja më besnike e Hitlerit. “Kjo grua erdhi tek unë në një kohë, kur të gjithë të tjerët po largohen prej meje. Ju nuk mund ta besoni se çfarë do të thotë kjo për mua”- i tha në konfidencë Hitleri ndihmësit të tij. Por në vitin 1929, Braun ishte thjesht një bjonde seksi, që e kuptoi të ardhmen që fshihej tek Fyhreri 40-vjeçar. Ajo rridhte nga një familje katolike. Bashkë me dy motrat e saj, Eva u rrit në Mynih. Ajo udhëtonte shpesh me familjen, sidomos në Itali. Kur u ngjit në pushtet, Hitleri rrethohej nga shumë gra. Dhe për vite me radhë, Braun ishte vetëm njëra nga shumë gratë me të cilat kishte lidhje Hitleri. Por Braun donte më shumë sesa kaq. Sipas historianit Alan Bullok, Eva do të bëhej dominante në marrëdhëniet e tyre: “Iniciativa ishte e gjitha në anën e Evës. Ajo u tha miqve të saj se Hitleri ishte i dashuruar me të, dhe se do ta bindte që një ditë të martohej me të”. Më 1935, Braun u trondit nga lajmi se Hitleri kishte zgjedhur një të dashur të re. Por ajo e dinte se nuk nuk mund të priste monogami prej tij. Megjithatë, Braun u ndje e injoruar nga Hitleri gjatë marrëdhënies së tyre. Hitleri ishte i fiksuar pas privatësisë së lidhjeve të tij intime. Ajo i mbështeti politikat e Hitlerit, dhe u bë një nga figurat më të rëndësishme në rrethin e brendshëm të diktatorit. Në fund të viteve 1930 dhe fillimin e viteve 1940, Braun nisi të kontrollojë qasjen e të tjerëve tek Hitleri. Liderët nazistë si Albert Shper dhe Jozef Gëbels, i kërkuan Eva Braunit që të forcojë lidhjet e tyre me Fyhrerin. Në prapaskenanë, Braun u bë eksperte e marrëdhënieve me publikun e Rajhut të Tretë. Ajo e filmoi Hitlerin në Berghof, duke e portretizuar atë si një udhëheqës të kujdesshëm që i donte shumë fëmijët. Ajo e fotografonte vazhdimisht diktatorin, dhe ia shiste fotot Hajhrih Hofmanit, duke u bërë një grua e pasur. Më 29 prill 1945, ndërsa sovjetikët po sulmonin Berlinin, Adolf Hitleri dhe Eva Braun u martuan më në fund. Dasma e tyre u zhvillua në një bunker nëntokësor, me pjesëmarrjen e disa besnikëve të Fyhrerit. Më pas, Hitleri u tërhoq në dhomë të shkruante testamentin e tij të fundit. Për të shmangur turpin e kapjes gjallë, Hitleri vendosi të kryejë vetëvrasje. Braun pranoi që të vdiste bashkë me të./Alsat

Leave a Reply

Your email address will not be published.