Mbajtja e zgjedhjeve të jashtëzakonshme ishte fokusi i diskutimeve mes kryeministrit të Kosovës Albin Kurtit dhe kryetarit te PDK-së Memli Krasniqi. Pas takimit mes tyre shefi i qeverisë u shpreh se është i interesuar që të diskutojë me subjektet politike për datën më të përshtatshme për zgjedhjet e reja parlamentare në Kosovë.
“Për shpërndarjen e Kuvendit nevojiten 80 vota dhe LVV-ja nuk i ka. Njëkohësisht unë nuk do të preferoja që të shpërndahet Kuvendit me dy parti, apo tri. Pse mos të bëhemi të gjithë bashkë. Është në natyrën e opozitës që të kërkojë zgjedhje, ndërkaq unë jam në vitin e fundit të mandatit, qeverisja ime në këtë mandat nuk mund të zgjasë më shumë sesa disa muaj. Për mua nuk është thelbësore a do të qeverisi në këtë mandat edhe 10 muaj, tetë, apo tre muaj. Por është e rëndësishme që të kemi një konsensus sa më të gjerë për datën e zgjedhjeve”, tha Kurti.
Kryetari i Partisë Demokratike Memli Krasniqi deklaroi se zgjedhjet e parakohshme janë shndërruar në domosdoshmëri për Kosovën.
“Zgjedhjet nuk janë dëshirë e jona , por nevojë e vendit, janë domosdoshmëri pikërisht për t’ju dhënë përgjigje me një qeveri të re këtyre çështjeve të cilat i ngrita. Ka ende data të cilat janë në disa javët e ardhshme që janë brenda kësaj kornize kohore, ku shpresoj shumë që do të kemi dakordësim edhe me parti të tjera parlamentare”, tha Krasniqi.
Ndërkohë lidhur me këtë çështje ka reaguar edhe kryetari i Aleancës për Ardhmërinë e Kosovës Ramush Haradinaj i cili ka theksuar se partia e tij do të mund ta mbështeste shpërbërjen e parlamentit vetëm pas dorëheqjes apo shkarkimit të Albin Kurtit.
“Sidoqoftë, Aleanca për Ardhmërinë e Kosovës, do të mund ta mbështeste shpërbërjen e Parlamentit, vetëm pas dorëheqjes apo shkarkimit të Kryeministrit. Në situatën në të cilën jemi aktualisht, të gjitha dështimet e Kosovës, brenda dhe jashtë, e kanë vetëm një emër – Qeveria e udhëhequr nga Albin Kurti”, tha Haradinaj.
Kryeministri Kurti tha se do të këmbëngulë të takohet me të gjitha partitë opozitare, për të kërkuar bashkëpunimin e tyre për votim të marrëveshjeve ndërkombëtare./vizionplus.tv
