Në mbledhjen e gjashtë të këshillit ministror për integrimin, kryeministri i Albin Kurti tha se Kosova është e gatshme për statusin e vendit kandidat, por edhe për hapjen e negociatave me Bashkimin Evropian.
Ai theksoi se anëtarësimi në union duhet të jetë i bazuar në meritokraci.
“Si demokracia më e avancuar në rajon, ne jemi të gatshëm t’u përgjigjemi mijëra pyetjeve teknike që vijnë nga Komisioni Evropian. Krahasuar me rajonin, Kosova është jo vetëm e gatshme për statusin e vendit kandidat, por edhe për të hapur negociatat me kapitujt e shumtë drejt anëtarësimit”, tha Kurti.
Kurti gjithashtu bëri thirrje për heqjen e masave ndëshkuese të BE-së ndaj Kosovës.
“Masat që janë në fuqi ndaj Kosovës bien ndesh me përpjekjet e rajonit për integrim në BE, sidomos edhe me planin e rritjes e me qëllimet e tij. Ne kemi përmbushur të gjitha përpjekjet e BE-së për të hequr masat kufizuese dhe këto masa duhet të hiqen”, tha ai.
Më 15 dhjetor të vitit 2022, Kosova aplikoi për tu anëtarësuar në BE, por që prej asaj kohe e deri më sot mbetet i vetmi vend në Ballkanin Perëndimor që nuk e ka statusin e vendit kandidat për anëtarësim në bllok. /vizionplus.tv
