Kurti anulon takimin me presidentin Thaçi

Kryetari i Lëvizjes Vetëvendosje, Albin Kurti ka anuluar takimin me presidentin e vendit Hashim Thaçi që ishte parashikuar të zhvillohej këtë të premte.

Sipas njoftimit të shpërndarë nga VV bëhet me dije se anulimi i këtij takimi është bërë për arsye se Kurti nuk ndodhet në Prishtinë.

 “Kryetari Kurti e ka sot të pamundur ta takoj Presidentin, meqenëse ndodhet jashtë Prishtinës. Ai do ta njoftojë së shpejti Presidentin për ditët e orët e mundshme të takimit”.

Ndërkohë më herët presidenti i Kosovës, Hashim Thaçi kishte kërkuar të takohet me Kurtin të premten në orën 13:30 në takimin konsultativ.

Thaçi i ka bërë ftesë Kurtit një ditë pas konstituimit të Kuvendit të Kosovës.