Këto janë disa nga kullat karakteristike në fshatin Kurdari të Njësisë Administrative Suç në Bashkin Klos. Vetë nga pamjet këto kulla mbajnë mbi supe shekuj, por që ende vazhdojnë të qëndrojnë në këmbë, madje si dikur. Kullat me vlera të mëdha historiko-kulturore, janë të shtrira në të gjithë njësinë Suç, por ende në to nuk ka investime të mirëfillta që mund të shfrytëzohen për turizëm.
Administratori i Njësisë Administrative Suç në Bashkinë e Klosit, Ilirian Çeliku thotë se ka një inspektim nga Instituti i Monumenteve të Kulturës me seli në Lezhë, por ende nuk ka një rikonstruksion të plotë të tyre, për t’i kthyer ato në bujtina për vizitor të ndryshëm.
“Kanë qenë ekspert të Drejtorisë për Rajonin e Veriut të Institutit të Monumenteve të Kulturës në Lezhë, të cilët kanë ardhur dhe i kanë inspektuar dy herë. Këto kulla janë shumë karakteristike, pasi janë 200 apo 300 vjeçare. Për shkak të mos ndërhyrjes në to, disa prej tyre i kemi humbur, por ka edhe të tjera që ende qëndrojnë. Familjarët nuk i kanë mundësitë ekonomike për të ndërhyrë, prandaj duan një ndihmë. Disa nga kullat janë monumente kulture të mbrojtura, ndaj dhe ndërhyrja nuk mund të bëhet pa miratim të ministrisë së Kulturës. Ndërhyrja në këto vepra, do t’i shërbente zhvillimit të turizmit, pasi atom und të kthehen edhe në bujtina. Për fat të mirë ne në të gjithë njësinë kemi shumë të tilla që duan investim”.
Për Administratorin e Suçit, Ilirian Çeliku Bashkia e ka të pamundur të investojë me buxhetin e saj, por ai shton se pushteti vendor do të ndihmojë në marrjen procedurave të nevojshme për ndërhyrje qoftë nga Instituti i Monumenteve të Kulturës, qoftë nga vetë banorët.
“Bashkia jonë nuk ka buxhet të mjaftueshëm për ndërhyrje. Banorët dhe pronarët e këtyre kullave kërkojnë mbështetje. Ne jemi të hapur për tju dhënë asistencën e nevojshme dhe lejet për ndërhyrje por nuk mund të bëjmë më shumë për to. Është në dorën e Ministrisë së Kulturës që t’i mbështesë dhe zona jonë të kthehet në një atraksion turistik”.
