Në ambientet e Muzeut Etnografik në Durrës u zhvillua mbrëmja poetike “Një gotë për Dorin”, një aktivitet i organizuar nga trupa e Teatrit “Aleksandër Moisiu”, kushtuar poetit, shkrimtarit dhe publicistit Teodor Keko.
Mbrëmja solli në vëmendje krijimtarinë e një prej zërave më të veçantë të letërsisë shqipe, përmes interpretimit skenik të poezive nga aktorët Mimoza Marjanaku, Ervin Doko, Era Çaushi, Romir Zalla, Adelina Muça, Jaho Guma, Suela Bako, Marvin Tafaj dhe Alesia Xhemalaj.
Publiku përjetoi një atmosferë të mbushur me emocion, ku poezia u kthye në urë mes kujtesës dhe artit, duke nderuar veprën dhe trashëgiminë letrare të Teodor Kekos.
“Është një emocion i veçantë se poezitë që lexova i dedikohen të shoqes, Xhulit, dhe kjo i bën ato edhe më të ndjera”, tha Romir Zalla, aktor.
Mes emocioneve, bashkëshortja e poetit, Xhuli Keko, e cilësoi këtë aktivitet si mënyrën më të bukur për të përkujtuar Dorin, në prag të 24-vjetorit të ndarjes së tij nga jeta dhe ditëlindjes së tij më 2 shtator.
“Mendoj që tani ka ardhur koha e veprës së tij, se ato çfarë ai kishte lënë unë i kisha botuar , që i kishte lënë amanet, tani mendoj që do botoj veprën e zgjedhur të tij”, u shpreh Xhuli Keko, bashkëshortja e Teodor Kekos.
Mbrëmja poetike “Një gotë për Dorin” u kthye në një homazh të ndjerë për një nga figurat më të dashura të letrave shqipe, duke dëshmuar se poezia dhe fjala artistike vazhdojnë të mbeten të gjalla në kujtesën e publikut.
