Postriba përkujtoi 79-vjetorin e kryengritjes së parë antikomuniste në vend. Ceremonia e organizuar me këtë rast nisi me vendosjen e kurorave me lule në memorialin kushtuar kësaj ngjarje.
Drejtues të Bashkisë Shkodër dhe Këshillit Bashkiak kanë vendosur të parët kurorat me lule ne nderim të kësaj date historike.
Drejtuesi politik i Partisë Demokratike në Qarkun e Shkodrës, Luçiano Boçi, u ndal te mesazhi që vjen nga kjo ngjarje historike, duke e cilësuar Postribën si simbol të parë të rezistencës antikomuniste.
Duke bërë një krahasim mes të kalurës dhe situatës aktuale, sekretari i Përgjithshëm i Partisë Demokratike, Flamur Noka, paralajmëroi se Shqipëria rrezikon të përballet me një diktaturë të re.
9 shtatori i 1946, shënoi revoltën e parë antikomuniste dhe me përmasat që mori, u cilësua e para e këtij lloji jo vetëm në Shqipëri, por dhe në Evropën Lindore.
Një grup prej 200 vetash të drejtuar nga Jub Kazazi dhe Osman Haxhia, sulmuan kazermat ushtarake dhe ndërtesat qeveritare, por pa sukses.
Pas shtypjes së kryengritjes nisën edhe proceset ndëshkimore gjyqësore të shkëputura nga njëra-tjetra, për shkak të numrit të madh të të akuzuarve.
Në gjyqet e para përveç se të dyshuarve si kryengritës, u nxorën edhe një numër të madh klerikësh dhe intelektualësh të Shkodrës./vizionplus.tv
