Presidenti i Kubës, Miguel Díaz-Canel, akuzoi sot homologun e tij amerikan, Donald Trump, se po përpiqet të “mbysë” ekonominë e ishullit, në një kohë kur ndërprerjet e përditshme të energjisë elektrike po shtohen dhe radhët në pikat e karburantit po bëhen gjithnjë e më të gjata.
Të enjten, presidenti i Shteteve të Bashkuara nënshkroi një dekret që parashikon se Uashingtoni “mund” të vendosë tarifa doganore, ende të papërcaktuara, ndaj vendeve që shesin naftë për Kubën, duke argumentuar se ishulli përbën një “kërcënim” për sigurinë kombëtare amerikane.
“Me pretekste të rreme dhe pa asnjë argument real, presidenti Trump synon të mbytë ekonominë kubane duke vendosur tarifa ndaj vendeve që tregtojnë naftë me Kubën”, shkroi Díaz-Canel në platformën X.
Dekreti rrit më tej presionin mbi Kubën, një vend me rreth 9,6 milionë banorë, i cili po përballet me një krizë të thellë ekonomike dhe vështirësi serioze në sigurimin e karburanteve dhe energjisë elektrike.
Ditët e fundit, radhët në pikat e karburantit në Havanë janë shtuar ndjeshëm, ndërsa ndërprerjet e energjisë në kryeqytet arrijnë deri në dhjetë orë në ditë.
Për shkak të ndërprerjeve të energjisë, të cilat vështirësojnë aksesin në internet dhe në media, shumë kubanezë nuk ishin të informuar për kërcënimin amerikan.
Jorge Martínez, një 60-vjeçar që po shkonte në punë dhe u informua nga një gazetar i Agjencisë Franceze të Lajmeve, shprehu shqetësimin e tij.
“Kjo do të ndikojë drejtpërdrejt në jetën tone. Herët a vonë do të ketë pasoja për ekonominë, ky është qëllimi. Do të duhet të ulemi dhe të negociojmë me Trumpin”, tha tekniku i IT-së.
Ndërkohë, presidentja e Meksikës, Claudia Sheinbaum, deklaroi se vendi i saj do të kërkojë zgjidhje diplomatike dhe alternativa për të ndihmuar Kubën, pas kërcënimit të SHBA-së për vendosjen e tarifave.
Ajo paralajmëroi se masat e Uashingtonit mund të shkaktojnë një krizë të rëndë humanitare në Kubë, duke prekur infrastrukturën bazë dhe spitalet.
