Tetëmbëdhjetë vite të jetuara në burgun më famëkeq të historisë shqiptare, mes vuajtjeve dhe sakrificave për mbijetesë. Kardinali Ernest Simoni Troshani u rikthye në Spaç për të kremtuar Meshën e Shenjtë, në vendin ku dikur vuajti dënimin gjatë diktaturës komuniste.
Në këtë meshë morën pjesë ish-të burgosur politikë, përfaqësues të komuniteteve fetare, personalitete të jetës politike, si dhe dhjetëra besimtarë që u bashkuan në lutje dhe përkujtim të viktimave të regjimit.
Në fjalën e tij, Kardinali Ernest Simoni Troshani ndau kujtimet e dhimbshme nga periudha e diktaturës, duke u ndalur te arrestimi, vitet e burgimit dhe vuajtjet e përjetuara në Spaç.
Ai përcolli gjithashtu një mesazh paqeje, faljeje dhe shprese për të gjithë njerëzit.
Një mesazh të veçantë përcolli edhe Ati i Shenjtë, Papa Leoni XIV, i cili u bashkua shpirtërisht me këtë përkujtim. Në mesazhin e tij ai shkruante:
“Vëlla i nderuar. Me një mallëngjim të thellë bashkohem shpirtërisht me Eminencën Tuaj dhe me të gjithë ata që janë mbledhur në ish-kampin e burgimit të Spaçit, ku Ju ktheheni pas kaq vitesh për të kremtuar Eukaristinë, Sakrificën e Krishtit, e cila e shndërroi Kryqin nga shenjë vdekjeje në premtim jete. Ai vend, i gdhendur në kujtesën e popullit shqiptar, mbetet një prej faqeve më të dhimbshme të historisë së tij. Spaçi ka qenë një vend ku shumë njerëz kanë mbartur kryqin e rëndë të padrejtësisë; gjaku i atyre që kanë vuajtur dhe kanë vdekur mes atyre maleve e ka ujitur atë tokë, duke e bërë një dëshmi të heshtur besnikërie, guximi e shprese. Bashkohem në lutje për ata që kanë vuajtur dhe kanë vdekur në Spaç, që kujtimi i tyre të mbetet i gjallë dhe të jetë për brezat e rinj një thirrje e vazhdueshme për të respektuar dinjitetin e pacenueshëm të personit njerëzor, vlerën e lirisë dhe angazhimin për paqen”, tha Kardinali Ernest Simoni Troshani.
Në shenjë mirënjohjeje për qëndresën dhe vuajtjet gjatë viteve të burgimit, Kardinali Ernest Simoni Troshani u nderua me një dekoratë mirënjohjeje. Ai mori gjithashtu një dhuratë simbolike, për mbështetjen shpirtërore që u dha bashkëvuajtësve gjatë qëndrimit në kampin famëkeq të burgimit.
/vizionplus.tv
