Kryetarja e LSI-së Monika Kryemadhi pasditen e kësaj të diele është takuar me qytetarë të Fushë-Krujës, ku si temë diskutimi ka pasur zgjedhjet e vitit 2017, për të cilat tha se shitblerja e votave nga kryeministri Rama dhe PS nëpërmjet grupeve kriminale bëri që Shqipërisë ti vështirësoheshin dhe kushtet për hapjen e negociatave.
Kryetarja e LSI-së theksoi se Partia Socialiste ka sot në parlament të paktën 5 mandate me vota të vjedhura dhe 28 mandate të blera me paratë e drogës.
“Për herë të parë në raport shkruhej se denoncimet e kandidatëve për deputetë të LSI dhe të Partisë Demokratike akuzojnë dhe denoncojnë blerjen e votave dhe përdorimin e segmenteve kriminale. Për herë të parë në një raport të OSBE-ODIHR në 30 vjet tranzicion mbas zgjedhjeve të 96-ës, kemi që kryeministri fton punonjësit e policisë që të hedhin kapelet dhe të dalin të mbledhin vota për Partinë Socialiste. Në një vend demokratik dhe në një vend europian kjo nuk mund të ndodhë. Tashmë kemi 400 CD ku vetëm tre minuta zbadhi Zëri i Amerikës dhe me thënë të drejtën opozita nuk kishte ndonjë ndikim në prokurori, sepse prokurorinë e ka zgjedhur vetë Edi Rama me 69 vota. Prokurorinë, Vettingun e prokurorëve dhe gjyqtarëve e bën vetë Edi Rama, por kemi një dosje e cila është dosja e famshme 339 dhe dosja 184 ku implikimi i Edi Ramës dhe drejtuesve të Partisë Socialiste me blerjen e votës nëpërmjet bandave të krimit të organizuar është flagrante dhe e kanë kapur me presh në dorë Edi Ramën. Kjo do të thotë që ai Parlament është ilegjitim, kjo do të thotë që Partia Socialiste minimumi i ka pesë deputetë të vjedhur dhe 28 të blerë”.
