Kryetari i Bashkisë së New York City, Zohran Mamdani, ka deklaruar se është në bisedime aktive me autoritetet ligjore të qytetit për të mundësuar arrestimin e kryeministrit izraelit Benjamin Netanyahu, në rast se ai viziton Nju Jorkun në shtator për sesionin e Asamblesë së Përgjithshme të OKB-së.
“Në çfarëdo që lejon ligji në New York City, atë do të bëjmë. Por ne nuk do të shkruajmë ligje tona për këtë qëllim”, ka thënë Mamdani në një intervistë për The New York Times.
Sipas tij, po zhvillohet një “bisedë aktive” me Departamentin Ligjor të Bashkisë së Nju Jorkut për të parë mundësitë konkrete që jep ligji amerikan dhe ai lokal.
Mamdani e quajti Netanyahu “kriminel lufte” dhe theksoi se ai “i përket Hagës”.
Ai iu referua urdhër-arrestit të lëshuar nga Gjykata Penale Ndërkombëtare (ICC) ndaj Kryeministrit izraelit për akuzat e krimeve të luftës në Gaza.
“Besoj se Kryeministri Netanyahu i përket Hagës. Ai është një kriminel lufte që është akuzuar nga Gjykata Penale Ndërkombëtare”, tha Mamdani.
Ai shtoi se kjo është një mendim i ndarë nga shumë njerëz, “pikërisht për shkak të asaj që veprimet e tij kanë shkaktuar gjatë këtyre viteve të fundit”.
