Kryeministri Edi Rama garantoi se të gjitha banesat individuale të prekura nga tërmeti i 26 Nëntorit do të rindërtohen të gjitha. Premtimin ai e dha gjatë mbledhjes së katërt të Komitetit Kombëtar të Rindërtimit, duke ju referuar atyre banorëve që nuk e gjetën veten në prezantimin e bërë për punën e deritanishme të qeverisë.
“Të gjithë ata që janë interesuar për të këtë informacion dhe banojnë në zona rurale dhe nuk e gjejnë veten në këtë prezantim, duhet ta kuptojnë që ky prezantim lidhet me zonat e integruara. Ndërkohë që banesat individuale do të rindërtohen të gjitha. Këtu bëhet fjalë vetëm për zonat e rindërtimit që nënkupton më shumë se një banesë bashkë, siç do të ndodhë në Thumanë, në zonat e Tiranës dhe në zonat e tjera.”
Po ashtu, Rama kërkoi që të gjithë bashkëpunëtorët në procesin e rindërtimit të ecin në të njëjtën linjë. Sipas tij, nuk duhet që dikush të nisë rindërtimin më herët sepse do të ketë pasoja më vonë për njerëzit nëse gjërat nuk bëhen sipas rregullave.
“Të përfundojmë të gjithë brenda një plani të integruar. Kemi dakordësuar frenimin e nisjes përpara. Nisja përpara duket sikur të çon në një rrugë të shkurtër, por që të nxjerr gjatë. Modelet që ne kemi projektuar kanë të gjitha parametrat e nevojshëm dhe na jep mundësinë që të kemi një sasi të madhe dhe një përfitim të përbashkët që të bëjmë më shumë shtëpi. Të mos i bëjmë gjërat shpejt sot dhe pastaj njerëzit të paguajnë kosto.”
