Kryetarja e Lëvizjes Socialiste për Integrim, Monika Kryemadhi këtë të hënë ka zhvilluar një takim me strukturat në Tiranë, ndërsa u ka bërë thirrje të gjithë qytetarëve të dalin në protestën e 16 shkurtit.
Në thirrjen e saj Kryemadhi thekson se 16 shkurti do jetë një protestë popullore, pa flamuj politik dhe pa fjalime politike.
“Ne sot mbajmë vendin e parë në botë për azilkërkuesit. Iu premtua shqiptarëve se do të ulen taksat, u rritën taksat. Data 16 shkurt, opozita proteston, por nuk është protestë politikë. Çdo shqiptar duhet të dalë për hallin e vet. Të gjithë shqiptarët janë më të lodhur dhe më të varfër se 5 vite më përpara. Shqiptarët shikojnë si zgjedhje vetëm largimin nga vendi. Në 16 shkurt jam e bindur se ju do jeni të gjithë në shesh. Nuk do ketë fjalime sepse njerëzit nuk kanë nevojë për fjalë. Të gjithë së bashku të bëjmë ndryshimin e madh. Hapja e negociatave kushtëzon qeverinë të mos japë koncesione korruptive. Negociatat krijojnë një mjekësi të barabartë për shqiptarët. Protesta e 16 shkurtit është protestë popullore dhe pa flamuj politik. U bëj thirrje të gjithëve që të bashkohemi në 16 shkurt dhe të lëmë bindjen politike. Mos hajdeni as për LSI e as për Monikën, por hajdeni për hallin tuaj”.
Në ndër tjera kryetarja e LSI-së është shprehur se Shqipëria këtë vit është një vit që e presin sfida të mëdha.
“Shqiptarët dhe Shqipëria sot janë përpara disa sfidave shumë të vështira dhe sfida kryesore është hapja e negociatave. Të gjithë ne në një moment po themi dëshpërimi, themi: Po ç’na duhen negociatat? Ne nuk kemi bukë të hamë… Negociatat do t’i krijojnë Shqipërisë dhe shqiptarëve pritshmëri të tjera. Pse e them këtë? Sepse hapja e negociatave kushtëzon qeverinë për të mos dhënë koncesione korruptive siç ka dhënë deri më sot. Negociatat e kushtëzojnë qeverinë që të mos diskriminojë biznesin, kush është i qeverisë të mos paguajë taksa dhe kush është hallexhiu të shkojë në burg. Negociatat krijojnë një shëndetësi të barabartë për shqiptarët, krijojnë një drejtësi të barabartë për shqiptarët. Jo që hallexhinjtë arrestohen dhe futen në burg me vrap, ndërsa njerëzit e lidhur me politikën dhe kryeministrin njoftohen dhe largohen në drejtim të paditur….”
