Udhëheqësi i opozitës venezueliane Juan Guaido ka bërë thirrje për të përshkallëzuar protestat për të larguar nga pushteti presidentin Nicolás Maduro.
Guaido u kërkoi të punësuarve publikë që të ndërpresin punën pasi një gjë e tillë do të çonte në grevë të përgjithshme.
Një grua u vra dhe dhjetra u plagosën kur protestuesit dhe forcat e sigurisë u përleshën në Karakas të mërkurën.
Maduro ndërkohë hodhi poshtë sugjerimet se ai kishte qenë i gatshëm të largohej dhe akuzoi SHBA për drejtimin e një grushti shteti.
Ata që përfshiheshin do të dënoheshin, tha ai.
Tensionet e krizës venezueliane po sjellin gjithashtu edhe acarrim të marrëdhënieve midis SHBA dhe Rusisë.
Sekretari amerikan i Shtetit Mike Pompeo tha se SHBA mund të ndërmarrë masa ushtarake për të zgjidhur krizën ndërsa akuzoi Rusinë dhe Kubën për destabilizimin e Venezuleës me mbështetjen e tyre ndaj Maduro.
Kurse ministri i Jashtëm rus Sergei Lavrov i tha Pompeos se ndikimi i Amerikës ndaj Venezuelës ishte destruktiv dhe një shkelje e së drejtës ndërkombëtare.
Guaido shpalli veten udhëheqës të përkohshëm të Venezuelës në janar dhe është njohur nga më shumë se 50 vende, përfshirë SHBA, Mbretërinë e Bashkuar dhe vendet e Amerikës Latine.
Por Maduro I cili ka mbështetjen e Rusisë, Kinës si dhe kontrollin e ushtrisë ka refuzuar të heqë dorë nga pushteti.